Ширењето на Ковид-19 во Кина не треба „значително“ да влијае на Европа бидејќи варијантите што циркулираат таму веќе се присутни на Стариот континент, објави Светската здравствена организација (СЗО).
„Сегашното зголемување на бројот на случаи во Кина не треба значително да влијае на епидемиолошката ситуација со Ковид-19 во Европа“, рече директорот на СЗО за Европа, Ханс Клуге, на онлајн прес-конференција.
Тој ги повика земјите од тој дел од светот да усвојат мерки „кои ќе бидат пропорционални и не дискриминаторски“ кон патниците кои доаѓаат од Кина.
Неколку земји, како САД, Јапонија, Франција и Германија, воведоа обврска за негативен тест за патниците од Кина. Одреден број земји препорачаа да не се патува во Кина освен ако е апсолутно неопходно.
Минатата недела, Европската унија ги повика земјите-членки да воведат обврска за тестирање на патниците во Кина пред летото, препорачувајќи дека дваесет и седумте треба да го следат негативниот тест со „случајно тестирање“ по пристигнувањето на европска почва.
„Земјите се добро подготвени“
Според СЗО, 53 земји во регионот што се протега до Централна Азија се добро подготвени за борба против Ковид, благодарение на високата стапка на вакцинација.
Сепак, треба да се одржи високо ниво на контрола, предупредува организацијата на ОН.
„По долги три години од пандемијата, додека во многу земји здравствениот систем е преоптоварен, недостасуваат основни лекови, а персоналот е исцрпен, не можеме да си дозволиме дополнително да го оптоваруваме нашиот здравствен систем“, истакна Клуге.
„Ова би можело да се случи во случај на нова варијанта на загриженост, каде било и во секое време, вклучително и овде во Европа и во Централна Азија. Врз основа на она што досега го научивме, мора да бидеме способни да предвидуваме, детектираме и реагираме навреме, рече Клуге.