Авганистанецот Шариф Ахмадзаи (26), професионален боксер и соосновач на хуманитарна асоцијација, е уапсен во Атина под сомнение дека ја убил 38-годишната британска волонтерка Елизабет-Џејн Рос.
Грчката полиција го сомничи дека по убиството го сокрил нејзиното тело во ковчег и дека од нејзината банкарска картичка извадил илјадници евра, пишува The Telegraph.
Истрагата ја покренала сопругата на осомничениот
Телото на жртвата беше пронајдено на 18 јули во напуштена зграда во атинскиот кварт Кипсели, откако бездомник почувствувал непријатен мирис.
Првичните наоди од обдукцијата покажуваат дека Рос починала од задушување.
Клучна трага за полицијата дала сопругата на Ахмадзаи, Американката Алаина Хол, која ги пријавила своите сомнежи на 30 јули, откако идентитетот на жртвата бил објавен во јавноста.
Хол забележала дека нејзиниот сопруг не е дома на 15 јули. Ја проверила неговата локација преку споделената апликација и видела дека тој е во станот на Елизабет-Џејн Рос.
Двојката ја познавала волонтерката од Единбург преку нејзината невладина организација „Love Every Nation Athens“.
Ахмадзаи наводно се обидел да ѝ даде на сопругата 2.550 евра во кеш и нов iPhone 17 Pro. Таа се посомневала дека предметите се купени со парите се убиени и сè и предала на полицијата.
Ахмадзаи, наводно, признал дека го оставил телото во напуштена зграда и дека го користел мобилниот телефон на жртвата за да испраќа пораки до нејзиното семејство за да ги увери дека таа е жива.
На 1 август полицијата извршила претрес во неговиот дом и пронашла црн пиштол реплика и војнички нож.
Локалните медиуми објавија и снимки од надзорните камери на кои се гледа како маж што одговара на неговиот опис турка ковчег низ улиците на Атина.
Од бегалец до боксер и хуманитарец
Ахмадзаи побегнал од Авганистан на 15-годишна возраст, откако, како што напиша на својот блог, талибанците го убиле неговото семејство.
Неговиот татко, воен командант, бил убиен во заседа откако преживеал шест обиди за атентат. Тој како бегалец пристигнал во Грција во 2016 година на островот Лезбос.
Неговото 45-дневно патување пеш низ Пакистан, Иран и Турција е тема на краток филм продуциран од британски карикатурист и Меѓународната федерација на Црвениот крст.
Во кампот Морија на Лезбос, тој ја запознал волонтерката Алаина Хол, со која се оженил во 2023 година. Една година по пристигнувањето во Грција, тој го прифатил христијанството.
Во 2019 година, парот се преселил во Атина, каде што основале здружение и добиле дете. Во Атина имал и два професионален бокс меча, а во март годинава ја освои титулата државен првак во суперлесна категорија.
Жртвата го посветила својот живот за да им помага на другите
Во блог пост со наслов „Приказната на Шариф“, тој го опиша своето животно патување.
„Изгубив се што имав. Заслужив подобар живот од овој. Толку многу од моите соништа се уништени. Животот навистина не е фер, но никогаш не се откажав и никогаш нема да се откажам. Бог е на моја страна. Тој се уште не е готов со мене. Мојот најголем сон сега е да им служам на другите со се што имам”, напиша тој.
Убиената Елизабет-Џејн Рос, позната на пријателите како Лиза, била побожна христијанка и често патувала во Грција за да волонтира.
Нејзината хуманитарна работа, инспирирана од верата, ја однела во Курдистан, каде им помагала на сириските бегалци.
Во Атина, таа била позната по разговорите со бездомниците во посиромашните делови на градот, вклучително и областа на напуштен паркинг каде што се собираат зависници од дрога и бездомници.
Шариф Ахмадзаи се очекува утре да се појави пред истражен судија во Атина.