Американскиот државен секретар Марко Рубио денес изјави дека претседателот на Соединетите Американски Држави (САД) Доналд Трамп верува дека Израел е „доволно напреден и богат“ за да купи американско оружје без да се потпира на воена помош.
Тој им рече на новинарите на состанокот на Г7 во Париз дека Трамп сака што поскоро да го прекине сегашниот финансиски договор со Израел, објави „Тајмс оф Израел“.
„Преговараме за меморандум за разбирање, но очекувањето на претседателот е дека Израел сега е доволно напреден и богат за да биде купувач. Тие можат да купуваат оружје од нас, но ние повеќе не мора да го обезбедуваме финансирањето“, рече Рубио.
Според него, Израел исто така произведува оружје, па затоа дел од меморандумот за разбирање би ја вклучил можноста за заедничко производство.
Израелскиот премиер Бенјамин Нетанјаху претходно оваа година изјави дека сака да го повлече Израел од системот за помош на САД во следните десет години, но Трамп минатата недела наговести дека тоа може да се случи до крајот на годината.