Најмалку 60 христијани се убиени во два одделни напади во регионот Оромија во Етиопија, кој е зафатен од конфликти, соопшти Етиопската православна црква.
Црковните претставници изјавија дека сите жртви биле христијани, но не дадоа детали за тоа како ги загубиле животите или кој стои зад нападот.
Регионалната влада на Оромија и извор поврзан со бунтовничкиот сојуз кој се бори против владините сили во северниот регион Тиграј се обвинуваат меѓусебно за нападите, објавува Ројтерс.
Светиот синод на Етиопската православна црква Тевахедо објави дека 14 верници биле убиени во областа Мерти на 20 октомври и 46 во областа Шерка на 24 октомври.
Во соопштението на црквата, објавено во понеделник, се додава дека повеќе од 20 куќи биле изгорени и дека повеќе од 20 лица се хоспитализирани со сериозни повреди.
Регионалната влада изјави дека бунтовничкиот сојуз ги извршил нападите во обид да предизвика верски конфликт, но не понуди докази.
Извор поврзан со бунтовничкиот сојуз тврди дека убиствата ги извршила регионалната влада на Оромија, повикувајќи се на разговори со двајца локални жители.
Бунтовничката група на Оромо Ослободителната армија (ОЛА) – која регионалната влада ја обвинува за претходните напади врз православните христијани – не одговори веднаш на барањето за коментар.
ОЛА е една од седумте вооружени групи кои минатиот месец објавија формирање сојуз со цел соборување на владата на премиерот Абиј Ахмед.