Бројот на невработени во Германија падна под три милиони во септември, но сезонското подобрување на пазарот на трудот беше послабо од вообичаеното за овој период од годината, објави денес Федералната агенција за труд (BfA).
Во септември во Германија имало 2,994 милиони невработени, што е за 67.000 помалку отколку во август, но за 40.000 повеќе отколку во истиот месец минатата година, се додава во соопштението.
Стапката на невработеност се намали во споредба со август за 0,1 процентен поен, на 6,4 проценти, додека на годишно ниво се зголеми за 0,1 процент, објавува „Виршафтсвохе“.
Во септември обично започнува есенското подобрување на пазарите на трудот, но сега на почетокот на овој период нема голема динамика, изјави претседателката на Федералната агенција за труд, Андреа Налес.
Според неа, подобрувањето на економијата сè уште не се одразува на пазарот на трудот.
Побарувачката за работници во Германија остана релативно слаба, се додава во извештајот.
Во септември во Федералната агенција за труд беа пријавени 660.000 слободни работни места, што е за 30.000 повеќе од претходната година, пренесува Танјуг.
Во септември 1,082 милиони луѓе добиле надоместоци за невработеност, што е за 85.000 повеќе од претходната година.
Бројот на работоспособни корисници на основна социјална помош изнесуваше 3.704 милиони, односно за 145.000 помалку отколку во септември 2025 година.
Гледајќи ги федералните покраини, највисока стапка на невработеност беше во Бремен, 11,2 проценти, по што следува Берлин, 10,4 проценти.
Најниски стапки беа забележани во Баварија, 4,2 проценти, и Баден-Виртемберг, 4,7 проценти.