Градоначалникот на Општина Куманово, Максим Димитриевски, оствари средба со одбојкарките и тренерот на ЖОК „Златибор“ од Чајетина, Станко Брашанац, кои престојуваат во Куманово во рамки на возвратната посета и продолжувањето на спортската соработка со ЖОК „Куманово“.
На средбата присуствуваа и тренерот на ЖОК „Куманово“, Горан Станиќ, како и спортскиот новинар Марјан Стошевски.
Посетата на гостите од Чајетина следува по престојот на одбојкарките на ЖОК „Куманово“ на Златибор, каде што беа реализирани заеднички тренинзи и контролни натпревари со ЖОК „Златибор“.
Двете екипи преку овие активности имаа можност да разменат спортски искуства и да воспостават нови пријателства.
Во рамки на посетата во Куманово, во спортската сала „Куманово“ се одржа и интернационален турнир во одбојка за жени, на кој учествуваа ЖОК „Куманово“, ЖОК „Златибор“ – Чајетина, ЖОК „УГД Штип“ и ЖОК „Форца“ – Скопје.
Турнирот понуди можност за натпреварување меѓу екипите, но и за продолжување на спортските контакти и создавање нови пријателства меѓу одбојкарките и стручните тимови.
На средбата, Димитриевски истакна дека ваквите спортски соработки придонесуваат за размена на искуства и зајакнување на врските меѓу збратимените општини.
По повод освоеното прво место на интернационалниот турнир, градоначалникот, во име на ЖОК „Куманово“, им додели дипломи на гостите од Златибор.
Од Општина Куманово посочуваат дека и во периодот што следува ќе продолжи поддршката за спортските активности, со цел партнерството меѓу Куманово и Чајетина, како и соработката меѓу двата одбојкарски клуба, да продолжат преку нови заеднички тренинзи, натпревари и други активности.
Никола Ивановски