Железничкиот сообраќај во централните и северните делови на Холандија беше нарушен за време на утринскиот шпиц во вторник поради цевки намерно поставени на пругите, соопшти операторот на инфраструктурата ProRail.
Евидентирани се околу 20 вакви случаи.
Радиодифузерот NOS прикажа како долгите, тенки цевки се отстрануваат од пругите.
– Во оваа фаза, се чини дека станува збор за намерно нарушување на железничкиот сообраќај предизвикано од човечка активност. Сè уште не е познато кој е одговорен или кој е мотивот – објави ProRail, додавајќи дека националната полиција спроведува истрага.
Цевките го попречија не само железничкиот, туку и патниот сообраќај, бидејќи неколку патни премини мораа да останат затворени, објави компанијата ProRail.
Тие не можеа да прецизираат кога сообраќајот би можел да се нормализира.