Бројот на регистрации на нови компании во Европската унија во вториот квартал е намален за 0,5 отсто во однос на претходните три месеци, додека бројот на стечаи е зголемен за 5,7 отсто, објави денеска Евростат.
Регистрациите на нови компании се намалени во пет од осумте набљудувани сектори. Најголем пад има во индустријата каде што бројот на нови регистрации е намален за 3,6 отсто.
По нив следуваат угостителството и туризмот со пад од 3,4 отсто и образованието и општествените дејности, каде што бројот на пријавувања е намален за 3,2 отсто.
Од друга страна, секторот за информации и комуникации оствари силен пораст на новите регистрации од 8,8 отсто, додека градежништвото бележи пораст од еден процент.
Во финансиските услуги, бројот на регистрации остана на исто ниво.
Најмногу пораснаа стечаите во образованието
Зголемен е бројот на стечаи во пет од осум сектори, а најголем раст од 21,1 отсто е забележан во образованието и социјалните дејности. Потоа следуваа транспортните дејности кај кои бројот на стечаи е зголемен за 11,4 отсто и финансиските услуги со раст од 6,8 отсто.
Истовремено, намален е бројот на стечаи во туризмот и угостителството за 2,6 отсто, во градежништвото за 1,7 отсто, а во трговијата за 1,2 отсто.
Податоците на Евростат се однесуваат на вториот квартал од 2026 година и се споредуваат со претходниот квартал.