Стампедо кај храм во Индија. Седум лица загинаа (ВИДЕО)

On:
Сподели со своите пријатели

Во стампедото што избувна денес во хиндуистички храм во источната индиска држава Бихар, седум лица загинаа, а повеќе од десет лица беа повредени.

Властите наведуваат дека паниката меѓу илјадниците собрани верници е предизвикана од скинување на електричен кабел, пишува АП.

Несреќата се случила во близина на храмот Ашок Дхам во округот Лахисараи во источна Индија.

Илјадници верници се собраа на молитви на третиот понеделник од Шраван, еден од најсветите месеци во хиндуистичкиот календар.

Овој период, кој трае од јули до август, е посветен на обожавањето на богот Шива, а низ цела Индија е обележан со пост, молитви и фестивали за време на сезоната на монсуни.

ПРОЧИТАЈТЕ И:  Поплави по монсуните и циклоните на Филипините, најмалку 23 мртви

Локалниот службеник Шајлендра Кумар потврди дека повеќе од десет лица се однесени во владина болница на лекување.

Тој додаде дека точната причина за стампедото сè уште се истражува. Според првите информации, електричен кабел се скинал пред храмот околу 6:30 часот наутро, што предизвикало паника бидејќи верниците почнале да се растеруваат од страв од електричен удар.

Новинската агенција „Прес Траст оф Индија“ ја пренесува изјавата на Кумар дека под притисок на толпата, дел од заштитната ограда попуштил, по што луѓето почнале да паѓаат едни врз други.

Проблемот со масовните собири

Несреќи како оваа се чести во Индија за време на религиозни фестивали.

ПРОЧИТАЈТЕ И:  Трагедија на автопат во Италија: Родители возеле 100 км, не знаеле дека нивниот син починал во возилото

На вакви настани, стотици илјади, понекогаш дури и милиони луѓе се собираат на мал простор, а безбедносните мерки и контролата на толпата често се на недоволно ниво.

Во јануари минатата година, најмалку 30 лица загинаа кога десетици илјади хиндуси отидоа да се искапат во светата река за време на фестивалот Маха Кумб, најголемиот религиозен собир во светот.

Слична трагедија се случи во 2013 година во сојузната држава Мадја Прадеш. Потоа најмалку 115 лица беа прегазени или удавени во реката откако меѓу аџиите се појави паника поради гласини за уривање на мост.