Силен земјотрес со магнитуда од 4,5 степени според Рихтеровата скала го погоди подрачјето Земеринг во Австрија во петокот во 1:59 часот, а потресите беа почувствувани и во Виена и делови од Долна Австрија и Штаерска.
Според австрискиот сеизмолошки институт Геосфера Австрија, епицентарот на земјотресот бил осум километри југозападно од Глогниц во Долна Австрија и 15 километри источно од Мирцушлаг во Штаерска, на длабочина од четири километри.
Сеизмолозите наведуваат дека, со оглед на јачината на земјотресот, можни се мали штети во областа на епицентарот, а првите последици веќе се евидентирани.
Според австриските медиуми, земјотресот предизвикал лизгање на земјиштето на патот помеѓу Шотвајн и Брајтенштајн во округот Нојнкирхен.
Помали парчиња камења паднале на патот, поради што пожарникарите интервенирале за да го отстранат лизгањето на земјиштето и да овозможат повторно нормален сообраќај.
Засега нема информации за повредени или поголема материјална штета, но надлежните служби сè уште ја следат состојбата во подрачјето погодено од земјотресот.