Американската ковница ќе почне да произведува монети од еден долар со ликот на претседателот на Соединетите Американски Држави, Доналд Трамп, на предната страна, како дел од прославата на 250-годишнината од Соединетите Американски Држави, објави американскиот министер за финансии Скот Бесант.
Новиот дизајн ги содржи натписите „Слобода“, „Во Бога веруваме“ и „1776–2026“ на предната страна, додека на задната страна е прикажан белоглавиот орел од претседателскиот печат.
Ова е изменето решение во споредба со нацртот објавен во октомври.
На задната страна од тој претходен предлог беше прикажан Трамп со крената тупаница и зборовите „борба, борба, борба“, алузија на обид за атентат врз него во 2024 година.
Трамп рече дека му е чест што е на монетата.
„Ми дадоа монета. Од она што го разбирам, тоа е многу невообичаено“, рече Трамп во интервју за Фокс Бизнис. „
Критичарите ја доведоа во прашање легалноста на таков дизајн.
Американски закон од 1866 година предвидува дека портретот на живо лице не смее да се појавува на американските пари, но оваа одредба се однесува на хартиените пари издадени од Бирото за гравирање и печатење. Монетите ги ковува Ковачницата на САД.
Во 2020 година, Конгресот донесе закон со кој му се дозволи на секретарот за финансии да издава комеморативни монети од 1 долар за 250-годишнината од Соединетите Американски Држави, но тој закон конкретно забрануваше дизајнот да прикажува живо лице.
Во интервју за Фокс њуз што се емитуваше во вторник, Бесант истакна дека на 150-годишнината од Соединетите Американски Држави на монетата се наоѓа тогашниот претседател Калвин Кулиџ.
„Според тоа, можеме да ставиме ликот на живо лице на монетата“, рече Бесент.