Јемските Хути, кои се поддржани од Иран, објавија дека во понеделникот го нападнале меѓународниот аеродром Абха во Саудиска Арабија со ракети и дронови.
Тие тврдат дека ова е одмазда за воздушните напади врз меѓународниот аеродром во Сана, за кои ја обвинуваат Саудиска Арабија.
Нема извештаи за жртви во нападите, но ова е најголемата ескалација меѓу двете страни во последните неколку години.
Саудиските власти сè уште не дале коментар, пренесува АП.
Портпаролот на силите на Хутите, Јахја Сари, ги предупреди авиокомпаниите да го избегнуваат саудискиот воздушен простор сè додека, како што рече, не се укине блокадата на аеродромот во Сана.
Меѓународно признатата јеменска влада објави дека пистата во Сана била погодена за да се спречи слетувањето на ирански авион.
Хутите потоа најавија одмазда, со што заврши периодот на релативен мир во односите со Саудиска Арабија.
ОН повикува на преговори
На вонредната седница на Советот за безбедност на Обединетите нации беше изразена загриженост за можноста за ширење на конфликтот.
„Јемен и целиот регион не можат да си дозволат нов циклус на ескалација. Ги покануваме сите страни конструктивно да се вклучат во преговорите под покровителство на Обединетите нации“, изјави помошникот генерален секретар на ОН за политички прашања, Халед Киари.
Хутиите го контролираат главниот град Сана и поголемиот дел од северен Јемен од 2014 година, додека Саудиска Арабија предводи коалиција што ја поддржува меѓународно признатата јеменска влада.
Нови тензии избувнаа по спорот околу иранскиот авион што ја превезуваше делегацијата на Хутите на погребот на врховниот лидер на Иран, ајатолахот Али Хамнеи.
Јеменскиот министер за одбрана, Тахер ал-Акили, изјави дека пистата во Сана била погодена за да се спречи враќањето на тој авион од Иран и рече дека јеменските сили ќе одговорат на секое нарушување на воздушниот простор од страна на иранските авиони.
Сите аеродроми во Јемен се затворени
Хутиите тврдат дека авионот бил пренасочен кон Ходеида.
Властите во јужен Јемен во меѓувреме ги затворија сите аеродроми во земјата до понатамошно известување и наредија евакуација на областа околу аеродромот во Сана.
Претседателот на Јеменскиот претседателски совет, Рашад ал-Алими, изјави дека Иран побарал дозвола за летот на компанијата „Махан Ер“ од Техеран до Сана за враќање на делегацијата на Хутите, но барањето било одбиено.
Специјалниот претставник на ОН за Јемен, Ханс Грундберг, ги повика сите страни на дијалог со цел да се зачува релативниот мир што трае од постигнатото примирје во 2022 година.