Претседателот на Русија Владимир Путин и претседателот на Соединетите Американски Држави Доналд Трамп сè уште не постигнале конкретен договор за можна средба во Санкт Петербург и заедничка посета на познатиот музеј Ермитаж, објави денес портпаролот на Кремљ, Дмитриј Песков.
„Засега нема конкретни договори за тоа прашање“, изјави Песков за руската државна новинска агенција ТАСС, коментирајќи ги наводите за можна посета на американскиот претседател на вториот по големина град во Русија.
Трамп веќе го посети Санкт Петербург во 1987 година, кога, на покана на Советскиот државен комитет за странски туризам, престојуваше во тогашниот Советски Сојуз.
Во таа прилика, разговараа за можната изградба на хотелски комплекси во Москва, а потоа и во Ленинград.
Можноста за зајакнување на културната соработка меѓу двете земји неодамна ја посочи Јуриј Ушаков, помошник на рускиот претседател.
На 5 јули, тој изјави дека за време на телефонски разговор со Путин, Трамп истакнал дека се восхитува на Ермитаж, еден од најпознатите музеи во светот.
Според Ушаков, Москва и Вашингтон покажуваат интерес за соработка во различни области, вклучително и во културата, што би можело да придонесе за развој на билатералните односи во иднина, доколку постојат политички услови.
Иако во последните денови се шпекулираше за можна средба меѓу двајцата лидери во Русија, Кремљ нагласува дека засега нема официјален договор за времето, местото или програмата на можната посета.