Во текот на ноќта, украински дронови извршија голем напад врз подрачјето на Санкт Петербург и Ленинградската област, при што беа погодени нафтениот терминал и пристаништето Висоцк, објавија руските власти.
Москва тврди дека соборила повеќе од сто дронови, но нападите сепак предизвикале штета на важната енергетска и транспортна инфраструктура.
Гувернерот на Санкт Петербург, Александар Беглов, изјави дека градот бил цел на „масовен напад со беспилотни летала“ и дека бил погоден нафтениот терминал во градот.
Според него, во нападот немало смртни случаи или сериозни повреди, а последиците брзо биле санирани.
Во исто време, гувернерот на Ленинградската област, Александар Дрозденко, објави дека украински беспилотни летала го нападнале пристаништето Висоцк, околу 170 километри северозападно од Санкт Петербург на брегот на Финскиот Залив.
Тоа е важно руско пристаниште низ кое минуваат нафта, течен природен гас, јаглен и жито.
Дрозденко тврди дека руските противвоздушни одбранбени системи собориле 72 дронови над Ленинградскиот регион во текот на ноќта.
Напади се регистрирани и подалеку на југ, во Псковскиот регион, каде што, според локалниот гувернер, биле соборени повеќе од 30 дронови.
Пријавени се мали штети, вклучувајќи штета на фабрика во градот Велика Лука и неколку повредени лица.
Во последните месеци, Украина ги интензивира нападите врз руската енергетска инфраструктура, обидувајќи се да го наруши снабдувањето со гориво и да ја попречи логистиката на руската армија. Овие напади веќе предизвикаа недостиг на гориво во некои делови од Русија.
Санкт Петербург, кој се наоѓа на околу 900 километри од територијата под украинска контрола, веќе неколку пати беше цел на украински дронови.
Меѓу претходните цели беа истиот нафтен терминал и воен брод закотвен за време на одржувањето на Меѓународниот економски форум во Санкт Петербург во јуни.
BREAKING: Ukraine drones hit St Petersburg oil terminal in Russia pic.twitter.com/tnJ3h6OUOe
— Insider Paper (@TheInsiderPaper) July 4, 2026