Московската рафинерија за нафта привремено ја прекина преработката по големиот украински напад со дронови во неделата, објави Ројтерс, повикувајќи се на извори од индустријата.
Безбедносната служба на Украина (СБУ) претходно објави дека, во соработка со вооружените сили на Украина, во неделата спровела операција во која биле погодени воени и енергетски инсталации во Московскиот регион, вклучувајќи ја и московската рафинерија за нафта.
Градоначалникот на Москва, Сергеј Собјанин, објави дека 12 лица се повредени во близина на рафинерија во областа Капотња, во еден од најголемите напади врз руската престолнина за повеќе од една година.
Засилени напади врз руската нафтена инфраструктура
Двајца извори од индустријата изјавија за Ројтерс дека иако нападот не предизвикал значителна штета на објектот, сопственикот на рафинеријата, Гаспромнефт, одлучил привремено да го запре производството за да ги намали безбедносните ризици по нападот.
Според Ројтерс, московската рафинерија преработила 11,6 милиони метрички тони сурова нафта во 2024 година.
Привремените исклучувања на рафинериите во Русија станаа почести во последните месеци поради засилените украински напади врз енергетската инфраструктура што го финансира рускиот воен апарат.
Според „Блумберг“, украинските напади врз руската нафтена инфраструктура го достигнаа највисокото ниво за четири месеци во април, со најмалку 21 напад врз рафинерии, цевководи и нафтени постројки на море.