Карате клубот Ронин Доџо од Куманово оствари успешен настап на меѓународниот турнир „Шотокан Куп 2026“, кој се одржа на 26 април во Власотинце, Србија, освојувајќи вкупно пет медали – еден златен, еден сребрен и три бронзени.
На турнирот учествуваа околу 400 натпреварувачи со повеќе од 600 настапи, а покрај домаќините од Србија, свои претставници имаа и клубови од Македонија и Бугарија.
Со златен медал во кати се закити младиот натпреварувач Емил Миленковски, кој уште еднаш го потврди својот квалитет во пионерска конкуренција.
Бронзени медали во истата дисциплина освоија Марко Крстевски и Вук Величковиќ, додека во екипна конкуренција, ката-тимот составен од Емил, Марко и Вук го освои третото место.
Во борбите, Емил Миленковски и Вук Величковиќ имаа солидни настапи и турнирот го завршија без повреди, но без пласман на победничкиот пиедестал.
Најзабележителен настап во борбите имаше Марко Крстевски, кој стигна до финалето и за само еден поен остана без шампионската титула, освојувајќи сребрен медал.
Тренерот на клубот, Оливер Милорадовски, по настапот истакна дека е задоволен од прикажаното, но дека секогаш има простор за напредок.
„Уште еднаш изработивме без грешки и докажавме дека со упорна работа може да направиме добар резултат. Секогаш сум самокритичен и ќе барам повеќе работа во иднина. Мора и може да работиме подобро и тоа ќе ја поправи сликата со медалите“, изјави Милорадовски.
Посебно признание заслужува и Милица Милановска, натпреварувачка на Ронин Доџо Куманово, која на овој турнир настапи во улога на судија и, според клубот, покажа одлична работа и високо познавање на карате правилата.
Никола Ивановски