Заменик-министерот за надворешни работи на Иран, Казем Гарибабади, го обвини американскиот претседател Доналд Трамп за кршење на меѓународното право и извршување воени злосторства со заканување со напади врз цивилна инфраструктура.
„Ваквите закани претставуваат воени злосторства и флагрантно кршење на Повелбата на Обединетите нации“, рече Гарибабади, осврнувајќи се на членот што забранува употреба или закана со сила против територијалниот интегритет на државите.
Тој додаде дека Иран ќе одговори „решително, веднаш и на жален начин“ во случај на напад.
Експерти: Напаѓањето цивилни цели е воено злосторство
На заканите на Трамп се осврна Луис Морено Окампо, првиот главен обвинител на Меѓународниот кривичен суд, кој за Би-Би-Си изјави дека намерното насочување кон цивилни објекти – кои не се воени цели – е воено злосторство.
Трамп се заканува со пцовки дека ќе нападне електрани и мостови
Во последните денови, Трамп постојано се закануваше дека ќе нападне иранска инфраструктура, вклучувајќи електрани и мостови, ако Иран не го отвори Ормутскиот теснец до крајниот рок.
Американскиот претседател напиша на својата платформа Truth Social:
„Вторник е Ден на електраните и Ден на мостовите во Иран, сè во едно. Такво нешто никогаш порано не сте виделе!!! Отворете го тој е*ен теснец, луди копилиња, или ќе живеете во пекол – САМО ГЛЕДАЈТЕ! Слава му на Бога. Претседател ДОНАЛД Џ. ТРАМП.“