Британскиот премиер Кир Стармер денес изјави дека нема проценки дека копното на Велика Британија е цел на Иран.
„Постојано проценуваме дали сме безбедни и нема проценка дека сме цел на тој начин“, изјави Стармер пред новинарите, според Ројтерс.
Стармер ги даде коментарите кога беше прашан дали Велика Британија може да биде цел на Иран, по извештаите од викендот дека Иран испалил две балистички ракети кон американско-британската база Диего Гарсија во Индискиот Океан.
Стармер рече дека секој обид за повторно отворање на Ормутскиот теснец бара внимателно разгледување и одржлив план, а негов главен приоритет е да ги заштити британските интереси и да ја деескалира ситуацијата.
И британскиот министер Стив Рид претходно изјави дека нема проценка што ги поддржува тврдењата на Израел дека Иран планира да ја нападне Европа со балистички ракети, или дека е дури и способен да го стори тоа.
„Нема проценка што би го поткрепила она што е кажано“, изјави Рид за Би-Би-Си во врска со објавата на израелските одбранбени сили на социјалните мрежи во саботата дека Иран има ракети што „можат да стигнат до Лондон, Париз или Берлин“.