По период на постудена фаза, глобалниот климатски систем повторно се подготвува за доаѓањето на феноменот Ел Нињо, кој според најновите прогнози би можел да донесе екстремни температурни рекорди.
Центарот за предвидување на климата на Националната океанска и атмосферска администрација на САД (NOAA) минатата недела објави дека постои 62% веројатност овој феномен да се случи помеѓу јуни и август 2026 година.
Тропскиот Тихи Океан моментално е во студена фаза позната како ла ниња, но се очекува да заврши во наредните недели.
Преминот кон Ел Нињо се случува кога температурите на површината на морето се зголемуваат за најмалку 0,5 степени целзиусови над долгорочниот просек.
„Ел Нињо доаѓа“
Доколку тој пораст достигне праг од 2°C, феноменот се класифицира како „супер ел нињо“, за што прогнозерите на AccuWeather проценуваат дека има 15% веројатност до крајот на сезоната на урагани во ноември.
Експертите предупредуваат дека интензитетот на феноменот сè уште не е целосно предвидлив.
„Интензитетот е неизвесен, но постои можност за умерен до евентуално силен Ел Нињо оваа есен и зима“, рече Пол Пастелок, метеоролог и главен долгорочен прогнозер во AccuWeather.
Овој климатски модел, кој се јавува во просек на секои две до седум години, значително влијае на времето низ целиот свет.
За време на неговото траење, млазниот тек се движи кон југ, што обично носи суша во северните делови на САД, додека југоистокот се соочува со зголемен ризик од поплави.
Иако Ел Нињо ја потиснува активноста на ураганите во Атлантикот, истовремено ги зајакнува бурите над централниот и источниот Пацифик.
Иако 2024 година е моментално најжешката во историјата, научниците истакнуваат дека нов циклус би можел дополнително да ја затоплува планетата во блиска иднина.
Климатологот Зеке Хаусфадер на социјалната мрежа X ги објасни можните последици:
„Ел нињо доаѓа. Ќе ја зголеми нашата проценка за глобалните температури за 2026 година, иако сè уште е малку веројатно дека ќе ја надмине 2024 година како најжешка година, а би можела да ја направи 2027 година најжешката година досега. Важно е да се напомене дека без оглед на фазите на природните циклуси како ел ниња или ла ниња, глобалните температури продолжуваат да растат поради долгорочното влијание на климатските промени.“
Како што напишавме пред некое време, „силниот ел нињо може драматично да го преобликува млазниот тек, да ја зголеми активноста на бурите во делови од јужниот дел на САД и да ги промени глобалните временски обрасци со месеци“, според метеорологот Дејвид Шлотхауер.