Научниците предупредуваат за ширењето на птичјиот грип на Антарктикот, а еден водечки чилеански истражувач денес за АФП изјави дека е забележан сој кој „е способен да убие дури 100 проценти“ од заразената фауна.
Во последниве години, истражувачите предупредуваат за ширењето на птичјиот грип на тој замрзнат континент, каде што повремено престојуваат тимови научници, но нема постојана популација, пренесува ХИНА.
Чилеанскиот истражувач Виктор Неира и неговите колеги открија особено опасен сој на болеста уште во април 2024 година кај пет рибарки, еден вид поларна морска птица од редот на клукајдрвци, слични на галебите.
Оттогаш, вирусот се прошири на други видови, а бројни случаи се регистрирани по должината на 900-те километри крајбрежје што го проучувале овие научници.
За време на неодамнешната експедиција на Антарктикот, беа откриени нови случаи кај антарктичките корморани, јужните галеби, пингвините Адели и жолтоногите пингвини, како и кај антарктичките крзнени фоки, изјави Неира за АФП.
„Вирусот целосно се прошири низ целата антарктичка област, односно во делот каде што сме во можност да го спроведеме нашето истражување“, рече Неира, научник од Универзитетот во Чиле и член на Чилеанскиот антарктички институт (INACH).
„Оваа болест може да убие дури 100 проценти од птиците за краток период. На пример, во рок од еден или два дена може да убие 90 или 100 проценти од животните во одредена област“, предупреди Неира.
Животинските видови на Антарктикот често имаат помали вкупни популации, што укажува на уште поголем ризик од појава на болести.
Животни како што се антарктичките корморани и рибарки, на пример, вкупно се околу 20.000.
Научниците потсетуваат дека глобалниот бран на птичји грип ги погодува птиците и цицачите низ целиот свет од 2021 година и се шири преку миграцијата на птиците.
Тие исто така потсетуваат на тешката 2023 година, кога птичјиот грип уби илјадници Хумболт пингвини во Чиле.