Претседателката на Молдавија, Маја Санду, го отфрли предлогот да биде номинирана за Нобеловата награда за мир, велејќи дека наградата им припаѓа на украинските воени затвореници и други кои ризикуваат или ги даваат своите животи за мир.
Нејзината изјава дојде истиот ден кога Украина обезбеди враќање на 157 воени заробеници од руско заробеништво, во првата размена со Москва по речиси пет месеци, пишува Киев Индипендент.
„Благодарна сум што луѓето обрнуваат внимание на нашата земја и ја ценат нашата храброст и издржливост, но многу луѓе беа номинирани за оваа награда. Денеска ги гледав украинските воени затвореници кои се вратија дома од Русија, а тоа се луѓето кои ја заслужуваат наградата за мир“, изјави Санду за молдавската телевизија ТВ8.
Ја насочи земјата кон проевропскиот пат
Предлогот за номинација го поднесе Арилд Хермстад, пратеник во норвешкиот парламент, кој оцени дека Санду заслужува да се земе предвид за нејзината улога во одбраната на мирот и владеењето на правото.
Хермстад ја опиша како личност која е „на првата линија на одбраната на демократијата во Европа“.
Санду рече дека вистинските херои се оние кои ги жртвуваат своите животи или се ставаат во опасност за мирот во нивните земји и изрази надеж дека мирот во регионот ќе дојде што е можно поскоро.
Откако ја презеде функцијата, Санду цврсто ја води Молдавија на проевропски пат, заговарајќи поблиски врски со Европската унија и спротивставувајќи се на руското влијание.
Таа постојано ги осудува руските напади врз Украина и му изрази поддршка на Киев.
Молдавија, мала континентална земја меѓу Украина и Романија, се соочи со зголемени безбедносни и политички притисоци откако Русија започна целосна инвазија на Украина во 2022 година.
Проевропската Партија за акција и солидарност, поддржана од Санду, победи на парламентарните избори во 2021 година поради загриженоста за можно руско мешање.