Западните санкции имаат „значајно влијание“ врз руската економија, изјави специјалниот претставник на Европската Унија за санкции, Дејвид О’Саливан, во пресрет на четвртата годишнина од целосната инвазија на Русија врз Украина.
Иако призна дека санкциите „не се магично стапче“ и дека секогаш ќе има обиди да се заобиколат, О’Саливан оцени дека по четири години мерките дале конкретни резултати.
„Доста сум оптимист. Мислам дека санкциите навистина имаа значително влијание врз руската економија“, рече О’Саливан во интервју за Гардијан.
Според него, во текот на 2026 година, може да се достигне точка каде што сегашниот економски модел ќе стане неодржлив поради прекумерното потпирање на воената економија на сметка на цивилниот сектор.
О’Саливан зборуваше по недели интензивни руски напади врз енергетската инфраструктура на Украина, додека земјата преживува екстремно студена зима, при што температурите во Киев паднаа на минус 20 степени Целзиусови оваа недела.
Според него, украинските претставници му рекле дека Русија минатиот месец лансирала двојно повеќе дронови и ракети отколку во јануари 2025 година.
Сепак, воените напори доаѓаат со висока цена за руската економија.
Приходите од нафта паѓаат, инфлацијата е околу 6%, а каматните стапки се на ниво од 16%, што, според проценките, претставува најголем притисок врз економијата од раните фази на војната.
Од почетокот на инвазијата во 2022 година, Европската Унија воведе вкупно 19 пакети санкции, насочени кон повеќе од 2.700 физички и правни лица, и ја суспендираше трговијата во клучните сектори, вклучувајќи енергетика, авијација, ИТ, луксузни стоки, дијаманти и злато.
О’Саливан изјави дека поголемиот дел од заобиколувањето на санкциите не доаѓа од владите, туку од економските актери кои гледаат можност да заработат пари.
Сепак, според него, Кина е исклучок, бидејќи „ги пополнува празнините“ и ѝ дава поддршка на Русија, иако не снабдува директно воена опрема.
Како што рече тој, ЕУ постигна значителен напредок во борбата против таканаречената руска „сива флота“, при што речиси 600 танкери беа ставени под санкции до декември, што дополнително го комплицира извозот на руска нафта, клучен извор на буџетски приходи.
Соединетите Американски Држави, под водство на сегашниот претседател Доналд Трамп, ја критикуваа ЕУ дека не отишла доволно далеку.
Американскиот министер за финансии Скот Бесент ја обвини Унијата дека „финансира војна против себе“ по трговскиот договор со Индија. О’Саливан, сепак, го бранеше договорот, нагласувајќи ја важноста на соработката со Индија, и покрај разликите во надворешната политика, според Гардијан.