Соединетите Американски Држави (САД) обезбедија 30 проценти повисока цена за венецуелската сурова нафта, објави министерот за енергетика Крис Рајт.
Вашингтон ја заврши првата продажба на венецуелска нафта во вредност од околу 500 милиони американски долари, според портпаролот на Министерството за енергетика на САД, а се очекуваат уште во наредните денови и недели, објавува SEEbiz.
„Добиваме околу 30 проценти повисока цена од пред три недели“, рече Рајт на настан на Американското здружение за енергетика, без да ги прецизира цените.
Американските специјални сили го заробија поранешниот венецуелски претседател Николас Мадуро претходно овој месец во операција за која Вашингтон рече дека имала за цел враќање на политичката безбедност.
Американскиот претседател Доналд Трамп минатата недела изјави дека Венецуела ќе предаде помеѓу 30 и 50 милиони барели нафта што моментално е под санкции на САД, а која ќе се продава по преовладувачките пазарни цени.
Во објава на социјалните мрежи, тој потсети дека ќе ги контролира приходите за да обезбеди дека средствата ќе се користат и во Венецуела и во САД.
Тоа би била само првата транша нафта, бидејќи Министерството за енергетика изјави дека продажбата на нафта од Венецуела ќе продолжи.
Венецуела има најголеми докажани резерви на сурова нафта во светот, околу 303 милијарди барели, но годините на недоволно инвестирање доведоа до сериозен пад на нејзината нафтена индустрија, со производство сега од околу 800.000 барели дневно, од врвот од 3,5 милиони барели дневно во 1990-тите.
Трамп кон крајот на минатата недела објави дека нафтените компании ќе инвестираат најмалку 100 милијарди долари во обновата на енергетскиот сектор на Венецуела, додавајќи дека САД ќе обезбедат сигурност за да се осигурат инвеститорите дека ќе добијат силни приноси.
Тој се сретна со лидерите на нафтената индустрија од Ексон, Шеврон, КонокоФилипс, Халибартон, Валеро и Марата во Белата куќа за да разговараат за инвестициите во Венецуела. Извршниот директор на Ексон, Дарен Вудс, му рече на Трамп дека венецуелскиот пазар е „неинвестирачки“ во неговата сегашна состојба.
Венецуела ги заплени средствата на „Ексон“ и „Коноко“ во 2007 година, а Каракас им должи на компаниите милијарди долари во нерешени побарувања од арбитражни случаи.
Овие настани се случуваат во време кога глобалните пазари на нафта се соочуваат со прекумерна понуда што влијаеше врз цените во текот на изминатата година.