Вистинска драма се случувала вчеравечер во кумановско откако 28-годишник наместо да застане на даден знак, удрил во полицаец, па бегал од полицијата.
– На 14.01.2026 во 23:30 часот во с.Романовце, кумановско, полициски службеници од СВР Куманово го лишија од слобода С.Ч.(28) од с.Романовце, информираат од Министерството за внатрешни работи.
Како што појаснуваат од полицијата, околу 22:30 часот во село Отља, липковско, тој не застанал на даден знак за запирање и со возилото „ауди а3“ со скопски регистарски ознаки, кое го управувал, удрил во полициски службеник и продолжил со движење.
– Во близина на село Романовце тој застанал, го напуштил возилото и почнал да бега, по што еден од полициските службеници испукал два предупредувачки куршуми во воздух, додаваат од МВР.
Набргу лицето било стигнато и фатено, при што пружал отпор и физички нападнал полициски службеник.
– С.Ч. е задржан во полициска станица и по целосно документирање на случајот против него ќе биде поднесена соодветна пријава, стои во соопштението.
Никола Ивановски