Речното корито на Пчиња е целосно исполнето со вода и е на граница на излевање на одредени места, информираат денеска од Управата за хидрометеоролошки работи.
– Значително висок водостој е регистриран и на река Пчиња кај Пелинце каде се очекува да биде исполнето речното корито и на граница на излевање на поедини места, посебно околу мостовските конструкции во горниот дел од течението на реката, велат од УХМР.
Како што додаваат оттаму, се очекува значително висок да биде водостојот на Пчиња во наредните часови, а на места да имаат полно речноо корита, а не се исклучува и можноста за локални излевања и заезерувања на поедини места.
Во меѓувреме Куманово е означено со жолто ниво на опасност за можност од поплави и излевања.
Висок е и водостојот на река Крива во Крива Паланка, но со тенденција за негово намалување таму и префлање на водите низводно по течението на реката.
Олеснителна околност е што врнежите ќе престанат, па се очекува водостоите да започнат да се намалуваат.
– Олеснителна околност е тоа што до крајот на денот врнежите ќе престануваат и опасноста од излевање на реките ќе се намалува, односно максимумот на реките се очекува во моментов да биде достигнат и од попладневните часови да има негово постепено намалување, стои во сопштението на УХМР.
Оттаму предупредуваат на внимателно движење покрај реките и суводолиците посебно во источните делови на земјата во текот на денот.
Никола Ивановски