Во бизарен инцидент во Јужна Кореја, обид за убивање лебарки со импровизиран фрлач на пламен заврши со трагичен пожар во станбена зграда во кој загина едно лице.
Јужнокорејската полиција објави дека ќе побарала налог за апсење на жената одговорна за предизвикување на пожарот, пишува BBC.
Како се случил пожарот?
Жена во дваесеттите години признала во полицијата дека во понеделник се обидела да запали лебарка користејќи запалка и запалив спреј.
Таа изјавила дека го користела овој метод и претходно, но овој пат пожарот излегол од контрола и ги зафатил предметите во нејзиниот стан.
Полицијата во северниот град Осан разгледува обвиненија за случаен пожар и убиство од небрежност.
Методот на истребување лебарки со дувачки факели или домашни фрлачи на пламен стана популарен благодарение на видеата на социјалните медиуми.
Сличен инцидент се случил во 2018 година во Австралија, кога еден човек ја запалил сопствената кујна додека се обидувал да убие лебарки со спреј против инсекти.
Трагичен обид за бегство
Кинеска државјанка на возраст од триесет години, која живеела на петтиот кат од зградата со својот сопруг и двомесечно бебе, го загубила животот во пожарот во Осан.
Кога го виделе пожарот, двојката го отворила прозорецот и повикала помош.
Тие успеале безбедно да го предадат своето бебе на сосед во соседната зграда, по што самите се обиделе да избегаат.
Нејзиниот сопруг успеал да се префрли во соседниот блок, но таа паднала од прозорецот кога се обидела да го направи истиот маневар.
Таа била итно префрлена во болница, каде што била прогласена за мртва неколку часа подоцна.
Полицијата верува дека двојката била принудена да избега низ прозорец бидејќи густиот чад целосно им го блокирал скалиштето.
Последици од разгорувањето
Зградата каде што избувнал пожарот има деловни простории на приземјето и 32 стана од вториот до петтиот кат.
Покрај смртниот случај, уште осум жители побарале помош поради вдишување чад.