Младиот актер Никица Јанковски од Театар Куманово ја освои наградата за најдобра улога за млад актер за својата интерпретација во претставата „Разбуди се Тина“, која ја освои публиката со искрената емоција и свежата енергија на младата актерска постава.
Главната награда за најдобра претстава припадна на претставата „Бог на колежот“ во изведба на Македонскиот народен театар – Скопје.
Наградата за најдобра актерка беше доделена на Рада Каирјакова за улогата во претставата „Постојаната сопруга“ на Сатиричниот театар „Алеко Константинов“ од Софија, Бугарија.
Горѓи Јолески од МНТ – Скопје беше прогласен за најдобар актер за својата изведба во истата наградувана претстава „Бог на колежот“.
За најдобра споредна женска улога наградата ја доби Јасмина Вучкова за настапот во претставата „Петок 13“ на Народен театар Струмица.
Наградата за најдобра споредна машка улога отиде кај Благојчо Стојанов од Театар „Јордан Хаџи Константинов – Џинот“ во Велес, за неговата улога во претставата „Госпоѓа Министерка“.
Наградата за најдобра сценографија ја доби Нина Пашова за работата на „Постојаната сопруга“ на Сатиричен театар „Алеко Константинов“ Софија, Бугарија.
Маријана Живковиќ од Народен театар Пирот, Србија, беше наградена за најдобра костимографија во претставата „Покондирена тиква“.
Престижната награда за најдобра режија беше доделена на Бојка Велкова, режисерка на „Постојаната сопруга“ на Сатиричен театар „Алеко Константинов“ Софија.
Одлуките за награди ги донесе жирито во состав: Александар Ивановски (претседател), Дубравка Киселички, Петар Андоновски, Гергана Трајкова и Стефан Јакимовски.
Фестивалот „Денови на комедија Куманово 2025“ заврши вчеравечер со претставата „Разбуди се Тина“ на Театар Куманово, која ќе се игра и вечерва, веднаш по доделување на наградите.
Никола Ивановски