Сирискиот претседател Ахмед ал-Шара пристигна во Њујорк во она што сириските медиуми го нарекоа „историска посета“ со цел да учествува на Генералното собрание на ОН.
Ова е прв пат од 1967 година сирискиот шеф на државата да присуствува на овој годишен собир, објави сириската новинска агенција САНА.
Ал-Шара официјално ја предводи делегацијата, во која се вклучени неколку министри и високи функционери.
Претседателството на Сирија објави на социјалната мрежа X дека ал-Шара се сретнал со група сириски емигранти во САД.
Тој ја нагласи „важноста на нивната улога во пренесувањето на вистинската слика за Сириската Арапска Република“ и изрази „благодарност за нивните искрени напори во служењето на татковината“.
Кој е Ахмед ал-Шара?
Ахмед ал-Шара, познат и по воениот прекар Абу Мохамед ал-Џолани, беше истакнат член и генерал на Ал-Каеда во Ирак, каде што учествуваше во вооружени акции против американските сили.
Тој беше уапсен и затворен во неколку американски и ирачки логори, вклучувајќи ги Камп Бука и Камп Таџи.
На почетокот на 2010-тите, по налог на раководството на Ал-Каеда, тој основа огранок на Џабхат ал-Нусра (Фронт на победата) во Сирија, кој наскоро стана една од најмоќните и радикални фракции во сириската војна, директно поврзана со Ал-Каеда.
Под негово водство, Џабхат ал-Нусра, а подоцна и Хајат Тахрир ал-Шам (ХТС), вршеа терористички и криминални активности како што се киднапирање, изнуда и напади врз цивили, за што ОН, САД, ЕУ и други меѓународни тела ги прогласија овие организации за терористички.
До неодамна, Американците нудеа 10 милиони долари за неговата глава.
Иако формално ги прекина врските со Ал-Каеда во 2016 година и се обиде да го преобликува имиџот на ХТС, меѓународните организации сè уште го сметаат за одговорен за бројни злосторства и терористичко минато, објавува Индекс.