Јапонските власти донесоа одлука да ги затворат сите шест филијали на непрофитната организација „Јапонски центар“ што работат во Русија, објави генералниот секретар на Владата Јошимаса Хајаши, според јапонските медиуми.
Хајаши истакна дека причината за овој потег е „моменталната состојба на руско-јапонските односи“, како и „ситуацијата во Руската Федерација“.
Според јапонскиот телевизиски канал TBS, Токио веќе ја информирал Москва за оваа одлука, барајќи да се обезбеди безбедноста на вработените во центрите.
„Јапонскиот центар“ е автономна непрофитна организација која се занимавала со обука на руски експерти, бизнис лидери и бизнисмени.
Семинари и предавања биле организирани како дел од неговите програми, а најуспешните учесници имале можност да се стекнат со пракса во Јапонија.
Одлуката за затворање дојде откако заменик-претседателот на рускиот Совет за безбедност, Дмитриј Медведев, изјави на 3 септември дека, како што рече, „лекциите од Втората светска војна престанале да се разбираат соодветно во многу земји, вклучително и во Јапонија“.
Во исто време, јапонската страна постојано ја нагласува потребата од обновување на контактите со Русија, иако политичките и економските односи на двете земји се сериозно нарушени поради украинската криза и санкциите воведени врз Москва.