Черепот на мадагаскарскиот крал убиен од француските сили за време на колонијалната војна официјално е вратен на Мадагаскар.
Предавањето на черепот на кралот Тоера и черепите на двајца други членови на неговиот двор се одржа на церемонија во Министерството за култура во Париз.
Черепите беа донесени во Франција кон крајот на 19 век и се чуваат во Природонаучниот музеј во француската престолнина.
Ова е прва примена на нов закон чија цел е забрзување на враќањето на човечките останки од колекциите во Франција.
„Овие черепи влегоа во националните колекции во околности што јасно го нарушија човековото достоинство и во контекст на колонијално насилство“, изјави француската министерка за култура Рашида Дати, како што објави агенцијата АФП.
Министер за Мадагаскар: Враќањето на черепите е значаен гест
Во август 1897 година, француските сили испратени да воспостават колонијална контрола врз кралството Менабе на народот Сакалава во западен Мадагаскар ја масакрираа локалната војска.
Кралот Тоера бил убиен и обезглавен. Неговата глава била испратена во Париз, каде што била сместена во архивите на Природонаучниот музеј.
Речиси 130 години подоцна, притисокот од потомците на кралот, како и од владата на Мадагаскар, го отвори патот за враќање на черепот.
Нема ДНК докази дека черепот му припаѓа на кралот Тоера, а тестовите спроведени пред неколку години беа неубедливи.
Сепак, спиритуалистички медиум од Сакалава потврди дека черепот му припаѓа на монархот.
Министерката за култура на Мадагаскар, Воламиранти Дона Мара, која исто така одржа говор на предавањето, нагласи дека враќањето на черепите е „значаен гест“.
„Нивното отсуство е отворена рана во срцето на нашиот остров повеќе од еден век“, рече таа.
Ова не е прв пат Франција да врати човечки остатоци од колонијалната ера, но тоа е прва примена на нов закон што го олеснува процесот.
Се проценува дека само во Природонаучниот музеј се сместени повеќе од 20.000 човечки остатоци донесени во Франција од целиот свет од наводно научни причини.