Во случај на политичка одлука, Германија би можела да развие нуклеарно оружје во рок од неколку месеци, изјави генералниот директор на Меѓународната агенција за атомска енергија (МААЕ), Рафаел Гроси.
Зборувајќи за глобалните нуклеарни прашања во интервју за неколку европски медиуми, Гроси изјави дека Украина донела правилна одлука кога го предала своето нуклеарно оружје на Русија по распадот на Советскиот Сојуз во 1990-тите, бидејќи, како што рече, во спротивно меѓународната заедница би можела да одбие да го признае нејзиниот суверенитет, објави полската „Република“.
Гроси зборуваше и за предизвиците што ги претставуваат Иран и Северна Кореја, наведувајќи дека меѓународната заедница мора да одржува конзистентност во следењето и инспекциите, но не даде конкретни детали во врска со моменталната состојба во тие земји, пренесува Танјуг.
Тој конкретно се осврна на нуклеарната централа Запорожје, која се наоѓа во воената зона на југот на Украина и моментално е под руска контрола.
Иако електраната е вон функција, тој предупреди дека опасноста не доаѓа од технички дефекти, туку од ризикот од воен удар.
„За разлика од Чернобил, кој користеше застарена технологија и имаше сериозни безбедносни недостатоци, Запорожје користи посовремени решенија од 1990-тите, вклучувајќи заштитни куполи и посовремени реактори. Сепак, проблемот е што се наоѓа во зона на конфликт“, рече Гроси.
Тој истакна дека електраната содржи шест реактори и голема количина на искористено нуклеарно гориво, што во случај на директен напад би можело да доведе до сериозно загадување и регионална нуклеарна катастрофа.