Европскиот суд за човекови права денес ќе донесе одлука за четири случаи што Украина и Холандија ги покренаа против Русија, обвинувајќи ја за сериозни кршења на човековите права за време на конфликтот во Украина, вклучително и соборувањето на летот MH17 на Малезија ерлајнс.
Оваа одлука претставува прв правен став на меѓународниот суд за одговорноста на Русија за настаните во Украина од 2014 година, според АП.
Судот во Стразбур ги сослушува барањата поднесени пред Русија да биде исклучена од Советот на Европа во 2022 година, по она што го нарече голем напад врз Украина.
Патничкиот авион MH17, кој леташе од Амстердам до Куала Лумпур, беше соборен на 17 јули 2014 година, над источна Украина, од територијата што тогаш ја контролираа проруските сепаратисти.
Во мај оваа година, Агенцијата за цивилно воздухопловство на ОН ја прогласи Русија за одговорна за несреќата, а судот во Стразбур претходно процени дека Русија имала ефективна контрола врз областите контролирани од сепаратистите, вклучително и снабдувањето со оружје и политичка поддршка, пренесува Танјуг.