Во понеделник, Европската комисија одобри 6,1 милијарди евра финансиска помош за Украина за набавка на противвоздушни и противракетни одбранбени системи, муниција и радари, што е дел од заем од 90 милијарди евра.
„На денот на независноста на Украина, Европа покажува дека нашата поддршка е непоколеблива и конкретна. Додека Русија ги засилува нападите, ние ја зголемуваме помошта за Украина за да го заштити својот народ и да го брани своето небо“, изјави претседателката на Европската комисија, Урсула фон дер Лајен.
Со овој одобрен план за јавни набавки, повеќето производи ќе бидат набавени од европски компании.
Со оглед на тоа што Русија ги интензивираше нападите со балистички ракети и млазни беспилотни летала, Комисијата ја нагласува потребата ЕУ да ја зголеми понудата од преостанатите залихи, со прераспределба на приоритетите за нарачки и зголемување на производството.
Пред денешната одлука, за Украина беа одобрени планови за јавни набавки во износ од 16 милијарди евра, од кои беа исплатени 8,35 милијарди евра. Украина ќе може да побара исплата на одобрените средства по потпишувањето договори со одбранбените компании.
Комисијата ќе ги разгледа тие договори пред да ги исплати средствата за да се осигури дека финансиската помош се користи за набавки договорени со земјите-членки и Комисијата.