Шпанскиот министер за надворешни работи, Хозе Мануел Албарес, денес изјави дека ќе побара од Советот на ЕУ да го одобри суспендирањето на договорот што ги регулира односите меѓу ЕУ и Израел „во знак на протест против кршењата на човековите права во Газа“.
Тој, исто така, рече дека ќе побара од Советот на ЕУ да одобри ембарго за продажба на оружје на Израел и да усвои санкции против поединци кои го поткопуваат решението за две држави, објави Ројтерс.
Израел во недела го отфрли извештајот на Европската унија во кој се вели дека еврејската држава можеби ги прекршила човековите права и обврски во окупираните палестински енклави на Појасот Газа и Западниот Брег.
Од почетокот на воената кампања на Израел против палестинската милитантна група Хамас, земјите-членки на ЕУ честопати го критикуваат огромниот број цивилни жртви во Појасот Газа, според Ројтерс.