Во Боливија вчера истече рокот за регистрирање на кандидати за претседателските избори, кои ќе се одржат во август, со што беше ставен крај на обидот на поранешниот претседател Ево Моралес да се кандидира за четврти мандат.
Со одлука на Уставниот суд на Боливија минатата недела беше потврдена забраната за отслужување повеќе од два претседателски мандати, со што се спречи Моралес, политички моќник речиси две децении, повторно да се кандидира, објави Танјуг.
Моралес, кој владееше од 2006 до 2019 година и беше првиот домороден претседател на Боливија, го оспори исклучувањето од изборите, а групите што го поддржуваа организираа протести и го запреа сообраќајот.
„Борбата не е изгубена, ќе водиме правна и социјална битка“, изјави Моралес за локалната радио станица Панамерикана.
Движењето за социјализам на Моралес, или МАС, кое доминираше во боливиската политика и ја зголеми застапеноста на домородното население во политиката во последниве години, се упатува кон изборите на 17 август како фрагментирана политичка сила, со најмалку три одделни фракции кои се борат за претседателската функција, објави Ројтерс.
Едуардо дел Кастиљо, поранешниот министер за внатрешни работи, е поддржан од сегашниот претседател, поранешен штитеник на Моралес и сегашен ривал, Луис Арсе.
Претседателот на Сенатот, Андронико Родригез, ја регистрираше својата кандидатура, иако неговото учество е во исчекување на судска одлука, додека Ева Копа, поранешна сенаторка на МАС и актуелна градоначалничка на Ел Алто, се регистрираше како кандидат за новата партија Морена.
Вкупно 10 кандидати ќе се кандидираат за претседател на Боливија, но аналитичарите предупредуваат дека е малку веројатно победникот да биде избран во првиот круг, а уште помалку веројатно е некој да освои двотретинско мнозинство во законодавното собрание, пренесува Танјуг.
Уставниот суд на Боливија објави дека списокот на кандидати сè уште може да се промени. Оставки се можни до 45 дена пред изборите, додека замени поради неможност или траен инвалидитет може да се случат до три дена пред денот на изборите.