Денес, Виетнам ја слави 50-годишнината од крајот на војната со Соединетите Американски Држави, со голема воена парада и акцент на градење мирна иднина.
Падот на Сајгон на 30 април 1975 година го означи крајот на војната и поделбата на земјата на комунистички Север и Југ под американска заштита.
Во таа прилика, генералниот секретар на Комунистичката партија на Виетнам, То Лам, истакна дека последните децении придонеле за зголемување на единството на народот, објави АП.
„Сите Виетнамци се потомци на Виетнам. Тие имаат право да живеат и работат, слободно да бараат среќа и љубов во оваа земја“, рече То Лам, додавајќи дека целата нација се стреми кон мир, единство, просперитет и развој.
Илјадници граѓани кампуваа на улиците на поранешниот главен град на Јужен Виетнам, сега Хо Ши Мин Сити.
На парадата беа претставени симболи на Виетнам, како што се националната птица Лак и портрет на Хо Ши Мин, додека кинески, лаосски и камбоџански војници маршираа зад виетнамските војници.
Авиони летаа над парадата, а хеликоптерите го носеа националното знаме додека минуваа покрај Палатата на независноста, каде што северновиетнамски тенк ги проби портите на последниот ден од војната.
Заедно со лидерот на Виетнам, То Лам, на парадата присуствуваа и поранешниот лидер на Камбоџа, Хун Сен и генералниот секретар на Комунистичката партија на Лаос, Тонглун Сисулит.
То Лам нагласи дека падот на Сајгон е „славна пресвртница“ што стави крај на 30-годишната борба за независност, која започна со борбата против француските колонијални трупи.
Тој додаде дека Виетнам денес ја должи својата позиција во светот на поддршката од Советскиот Сојуз, Кина, солидарноста со Лаос и Камбоџа, како и САД.
Оваа година се одбележува и 30-годишнината од воспоставувањето дипломатски односи меѓу Виетнам и САД.
Во 2023 година, Виетнам ги подигна односите со САД на ниво на стратешки партнер, највисок дипломатски статус што го доделува на која било земја, на исто ниво со односите со Кина и Русија.
Сепак, односите со САД се соочуваат со нови предизвици, истакнуваат медиумите, особено поради високите царини што ги воведе американскиот претседател Доналд Трамп и намалувањето на странската помош што влијаеше на напорите за санирање на последиците од војната во Виетнам.