Во Центарот за култура „Трајко Прокопиев“ Куманово утре со почеток во 11 часот ќе се одржи работилница за деца „Недовршена приказна“ под раководство на авторката Бистра Георгиева и илустраторката Катерина Николовска.
Работилницата е дел од Годишната литературна програма на Центарот за култура, поддржана од Министерство за култура и туризам.
Бистра Георгиева е автор на повеќе наградувани сликовници. Нејзината сликовница „Џиновска продавница за фантазии“, илустрирана од шпанската илустраторка Моника Каретеро, е добитник на наградата за најдобра книга за деца и млади и преведена и издадена на шпански јазик.
Таа е автор на десет сликовници од серијалот „Стела и Сани“. За својата работа е добитник на повеќе други награди, вклучувајќи: трето место за најдобра книга за деца за „Мистериозниот остров“ (МАИ, 2022), прво место за најдобра книга за деца за „Седумте Некоиси и седумте македонски композитори“ (МАИ, 2023) и трето место за најкреативно издание.
Катерина Тери Николовска е графички дизајнер и илустратор на повеќе дела меѓу кои: сликовниците „Волшебната комета“, „Шарената куќа“ и „Орелот Оли“ , дел од серијалот сликовници „Стела и Сани“, едицијата од четири сликовници „Бајки од Македонија“ . За сликовницата „Тигар на улица“ со нејзини илустрации таа по вторпат се најде во White ravens, каталог на 200 најдобри книги за деца и млади од целиот свет за 2023 година.
Работилницата е наменета за деца од четврто и петто одделение.