САД во вторникот предупредија дека кинеската разузнавачка служба користи измамнички методи за да регрутира сегашни и поранешни функционери на американската влада.
Предупредувањето од Националниот центар за контраразузнавање и безбедност доаѓа во време на масовни отпуштања во федералните институции предводени од Одделот за владина ефективност (DOGE) на Илон Маск.
„Странските разузнавачки субјекти, особено оние во Кина, ги таргетираат сегашните и поранешните вработени во американската влада за регрутирање, претставувајќи се како консултантски фирми, корпоративни ловци, тинк-тенкови и други ентитети на социјалните и професионалните мрежи“, се вели во билтенот на центарот.
Центарот рече дека измамничките огласи за работа преку интернет и другите пристапи станале пософистицирани во таргетирањето на поединци со искуство од владата на САД кои бараат ново вработување.
Тој ги предупреди сегашните и поранешните федерални функционери на ваквите пристапи.
Центарот додава дека поранешните вработени се должни да ги заштитат доверливите информации и откако ќе ја напуштат работата во федералните институции.
Кинеското Министерство за надворешни работи во средата соопшти дека не е свесно за ситуацијата и ги обвини САД за шпионирање на Кина.
Портпаролот на Министерството Лин Џијан ги нарече дејствијата на САД „неодговорна практика“ и рече дека тоа е „глобална шпионажа без никаква маска“.
Ројтерс претходно објави за мрежа на компании управувана од тајна кинеска технолошка фирма која се обидувала да вработи неодамна отпуштени функционери на американската влада.