Најмалку 55 лица, меѓу кои една бремена жена и 12 деца, загинаа во израелските напади врз Појасот Газа во текот на ноќта, соопштија денеска локалните здравствени власти.
Официјални лица во Кан Јунис соопштија дека телата на 14 жртви биле пренесени во болницата Насер, од кои девет од исто семејство, а меѓу загинатите има пет деца и четири жени.
Телата на уште 19 лица, меѓу кои и пет деца на возраст меѓу една и седум години и една бремена жена, се пренесени во Европската болница во близина на Кан Јунис, соопштија болничките власти.
Во градот Газа, телата на 21 жртва се префрлени во болницата Ахли, меѓу кои и седум деца, пренесува АП.
Во средата, израелскиот премиер Бенјамин Нетанјаху објави дека Израел воспоставува нов безбедносен коридор низ Појасот Газа за да изврши притисок врз Хамас, сугерирајќи дека ќе го отсече јужниот град Рафах, за кој Израел нареди да се евакуира, од остатокот од палестинската територија.
Нетанјаху ја нарече новата оска Коридор Мораг, користејќи го името на еврејската населба што некогаш се наоѓаше помеѓу Рафах и Кан Јунис.
Тој рече дека тоа ќе биде „вториот коридор Филаделфија“, мислејќи на коридорот во близина на границата Газа – Египет, кој е под контрола на Израел од мај минатата година.
Според палестинските власти, бројот на убиени Палестинци во Појасот Газа од октомври 2023 година надмина 50.000.