Претседателот Доналд Трамп ги претстави плановите за нови увозни царини за сите стоки што влегуваат во САД, што го означи најголемиот пресврт во меѓународниот трговски поредок од крајот на Втората светска војна.
Неговиот план воведува основна тарифна стапка од најмалку 10 отсто за целиот увоз, во согласност со предлогот што тој го даде на кампањата минатата година.
Производите од околу 60 трговски партнери опишани од Белата куќа како „најлоши престапници“, вклучително и Европската унија и Кина, ќе се соочат со уште повисоки царини – што Трамп го нарекува одмазда за нефер трговските политики.
Аналитичарите предупредуваат дека ескалацијата на трговската војна може да доведе до повисоки цени за Американците и забавен економски раст во САД, додека некои земји би можеле да паднат во рецесија.
Сепак, Трамп за време на соопштението во Белата куќа во средата рече дека овие мерки се неопходни бидејќи другите земји ги искористуваат предностите на САД со наметнување високи царини и други трговски бариери.
Белата куќа објави дека САД ќе почнат да наплаќаат тарифи од 10% на 5 април, додека повисоките царини за одредени земји ќе стапат на сила на 9 април. Царините се даноци за увоз.
За време на кампањата минатата година, Трамп рече дека ќе ги искористи за да ги зголеми приходите на владата и да го поттикне домашното производство, ветувајќи нова ера на американски просперитет.
Некои од највисоките царини ќе ги погодат земјите кои привлекоа големи инвестиции во последниве години, бидејќи многу компании ги преселија синџирите на снабдување од Кина поради тарифите на Трамп за првпат.
Лесото на листата
Така, стоките од Виетнам и Камбоџа ќе бидат погодени со царини од 46% и 49%, додека стоките од Лесото, мала африканска земја, ќе имаат царина од дури 50%.
Интересно е тоа што Лесото, малата африканска земја, за само неколку недели два пати беше нападната од американскиот претседател.
Да потсетиме, за време на своето обраќање пред американскиот Конгрес, во својот прв говор по враќањето во Белата куќа, Доналд Трамп го спомена Лесото додека ги набројува идните намалувања на УСАИД.
– Дадовме осум милиони долари за промоција на ЛГБТК+ во африканската земја Лесото, за која никој никогаш не слушнал – рече Трамп во таа прилика, предизвикувајќи смеа кај некои американски пратеници.
Министерот за надворешни работи на Лесото, Лејоне Мпотјоане, тогаш за Би-Би-Си изјави дека е „шокантно“ да се слушне шефот на државата како „зборува на таков начин за друга суверена држава“.
– На мое изненадување, „земјата за која никој никогаш не слушнал“ е токму онаа во која САД имаат постојано дипломатско претставништво – рече Мпотјоане за Би-Би-Си.
– Лесото е членка на ОН и на бројни други меѓународни организации. САД имаат амбасада овде, а голем број американски организации работат во земјата. Не ја сфаќаме оваа изјава лесно“, рече тој додавајќи дека Лесото ќе испрати официјално протестно писмо до Вашингтон.