Австралискиот премиер Ентони Албанезe денеска изјави дека планира „наскоро“ да распише избори.
Тригодишниот мандат на владата значи дека Австралија мора да одржи избори најдоцна до 17 мај, а анкетите покажуваат неизвесна трка во која опозициската либерално-национална коалиција има мала предност во однос на владејачката Лабуристичка партија, објави Ројтерс.
„Изборите ќе бидат во мај, тоа можам да ви го гарантирам“.
Локалните медиуми, повикувајќи се на неименувани извори, известуваат дека Албанезе утре ќе го посети генералниот гувернер во Канбера за официјално да ги распише изборите, а националното гласање ќе се одржи на 3-ти мај.
Владата во вторникот го претстави новиот пакет даночни олеснувања во вредност од 10,7 милијарди долари, кој ќе го намали просечниот данок на работниците за 268 долари во фискалната 2027 година и за 536 долари следната година.
Законот вчера наутро беше изгласан во Претставничкиот дом, а доцна вечерта во Сенатот, каде лабуристите немаат мнозинство, со поддршка на Партијата на зелените и независните пратеници, пренесува Танјуг.
Опозициската коалиција најави дека ќе го укине законот доколку победи на изборите, заменувајќи го со план за намалување на акцизите на горивото за една година.
Водачот на опозицијата Питер Датон рече дека таквата мерка ќе донесе „вистинско и итно олеснување“ за домаќинствата, заштедувајќи им околу 470 долари годишно.
Австралискиот благајник Џим Чалмерс го критикуваше планот на опозицијата, тврдејќи дека на Австралијците ќе им биде полошо на долг рок.
„Оваа одлука ќе ги прогонува секој ден од изборната кампања“, изјави Чалмерс за новинарите.