Турскиот претседател Реџеп Таип Ердоган изјави денеска дека „многу е можно турско-американските односи да добијат поинаков моментум во вториот мандат на американскиот претседател Доналд Трамп“.
Обраќајќи ѝ се на нацијата по состанокот на владата во претседателската палата во Анкара, Ердоган рече дека разговарал со Трамп за многу важни прашања во „срдечниот“ телефонски разговор, вклучително и отстранување на сите пречки за трговската цел од 100 милијарди долари, јавува Anadolu.
Ердоган и Трамп имаа телефонски разговор на 16 март, при што турскиот претседател изрази целосна увереност дека Анкара и Вашингтон ќе ја унапредат билатералната соработка во нова ера на односи со солидарност, пристап ориентиран кон резултати и на искрен начин.
Изразувајќи ја својата подготвеност да ги подобри односите на Турција со европските земји, Ердоган рече дека Европа не може да обезбеди безбедност без Турција.
– Жестоките дискусии во последните недели покажаа дека европската безбедност нема да биде можна без Турција – рече Ердоган.
Тој додаде дека се појасно е дека на Европа и е потребна Турција.
– Потребата на Европа за нашата земја почна отворено да се признава, не само во однос на безбедноста, туку и во многу области, од економијата до дипломатијата и од трговијата до општествениот живот – рече тој.
Тој изрази подготвеност за подобрување на односите со Европската унија.
– Турција е подготвена да ги подобри односите со европските земји и со Европската унија во рамките на заедничките интереси и меѓусебното почитување – заклучи тој.