Администрацијата на американскиот претседател Доналд Трамп планира да го отповика привремениот правен статус на околу 240.000 Украинци кои побегнале од војната со Русија, што би можело да ги стави на забрзан пат кон депортација, изјавија американски официјални лица и извори запознаени со плановите.
Оваа одлука, која би можела да стапи во сила веќе во април, претставува драстичен пресврт од пречекот на Украинците за време на администрацијата на претходниот претседател Џо Бајден.
Планираното отстранување на заштитата за Украинците е дел од пошироката стратегија на администрацијата на Трамп за отповикување на правниот статус на повеќе од 1,8 милиони мигранти кои влегле во САД во рамките на хуманитарните програми воведени за време на мандатот на Бајден, велат изворите.
Американското Министерство за домашна безбедност (DHS) соопшти дека во моментов немаат официјални соопштенија за ова прашање, додека Белата куќа и Украинската амбасада не одговорија на прашањата на новинарите.
На 20 јануари, Трамп издаде извршна наредба со која му наложува на DHS да ги прекине сите хуманитарни програми за прием на мигранти.
Како дел од тој план, покрај на Украинците, се очекува да им биде укинат и привремениот статус на околу 530.000 Кубанци, Хаиќани, Никарагваци и Венецуелци, што би можело да стапи на сила веќе овој месец.
Мигрантите кои ќе го изгубат статусот би можеле да се соочат со забрзана постапка за депортација, според внатрешните документи од американската служба за имиграција и царина (ICE), објавени од Ројтерс.
Оние кои илегално ја минале границата можат да бидат депортирани во рок од две години, додека за оние кои влегле легално, а не добиле официјални дозволи за престој, нема временско ограничување за итно протерување.
Програмите на Бајден беа дизајнирани да создадат привремени правни патишта за мигрантите и да ја спречат илегалната миграција, но Трамп за време на изборната кампања вети дека ќе ги укине, тврдејќи дека се спротивни на американскиот закон.
Покрај Украинците и гореспоменатите латиноамерикански бегалци, овие програми вклучија и повеќе од 70.000 Авганистанци кои избегаа откако Талибанците ја презедоа власта.
Исто така, околу милион мигранти ја користеа апликацијата CBP One за да закажат термин за влез на легалните гранични премини, додека илјадници други користеа помали програми, вклучително и програми за обединување на семејства за мигранти од Латинска Америка и Карибите.
Покрај Украинците, од оваа одлука се погодени и американските сојузници од Авганистан кои влегоа во САД според програмите на Бајден, што дополнително ја интензивира контроверзноста околу новата имиграциска политика на Трамп.