Американскиот претседател Доналд Трамп подготвува извршна наредба за укинување на американското Министерство за образование, исполнувајќи го долгогодишното ветување за елиминирање на институцијата, објави во средата Волстрит журнал.
Според извори блиски до администрацијата, наредбата би можела да биде издадена веќе во четврток.
Белата куќа и Министерството за образование не одговорија на прашањата на новинарите во врска со оваа тема.
Трамп постојано го критикуваше Министерството за образование, нарекувајќи го „голема измама“ и веќе се обиде да го укине за време на неговиот прв мандат, но Конгресот не го поддржа предлогот.
Овој потег е дел од поширокиот план на Републиканската партија за намалување на федералното влијание врз образовниот систем.
Новиот секретар за образование на Трамп, Линда Мекмахон, ја поддржа неговата иницијатива, наведувајќи дека за елиминација на одделот ќе биде потребно одобрение од Конгресот, но таа нагласи дека ќе се обезбеди федерално финансирање за сиромашните училишни области и студенти.
Од друга страна, поборниците на Министерството за образование предупредуваат дека неговото укинување може да доведе до сериозни нарушувања во распределбата на помошта од десетици милијарди долари за основните и средните училишта, како и за студентските стипендии.
Критичарите тврдат дека републиканците со овој потег сакаат да ги зајакнат приватните и профитно ориентирани образовни институции.
Одделот моментално го надгледува работењето на приближно 100.000 јавни и 34.000 приватни училишта низ САД.
Иако повеќе од 85% од финансирањето на јавните училишта доаѓа од федералните и локалните власти, федералната влада обезбедува значителни грантови за специјално образование, уметнички програми, реновирање на училишната инфраструктура и плати за наставниците кои работат со деца со посебни потреби.
Покрај тоа, Министерството за образование управува со портфолио за студентски заеми од 1,6 трилиони долари, што директно влијае на милиони Американци кои се потпираат на државни заеми за високо образование.
Последниот потег на Трамп е дел од неговите пошироки напори за намалување на бирократијата во федералната влада, иницијатива поддржана и од неговиот советник Илон Маск.
Сепак, елиминирањето на министерството на ниво на владата би претставувало еден од најрадикалните потези на неговата администрација.
За време на мандатот на претходникот на Трамп, Џо Бајден, Министерството за образование често беше мета на критики од републиканците, особено поради политиката за простување на студентските долгови и програмите посветени на различноста, правичноста и вклученоста.
Последната одлука на Трамп укажува на засилени напори на неговата администрација за преобликување на американскиот образовен систем во согласност со конзервативните принципи, пишува Ројтерс.