Американскиот претседател Доналд Трамп остро го критикуваше украинскиот претседател Володимир Зеленски, укажувајќи на неговата „непопуларност“ и недостатокот на информации за тоа каде отишла дел од американската помош.
Трамп рече дека е „повеќе уверен“ во постигнувањето договор со Москва и вети дека ќе се сретне со рускиот претседател Владимир Путин пред април.
Како одговор на прашањата на новинарите во неговата резиденција Мар-а-Лаго на Флорида, Трамп го критикуваше Зеленски дека ги осудил руско-американските разговори одржани вчера во Саудиска Арабија, бидејќи тие беа за „Украина без Украина“.
„Многу сум разочаран од тие изјави“, одговори Трамп, а потоа го нападна Зеленски, кого дури го обвини дека го започнал конфликтот во Украина.
„Денес слушнав „не сме поканети“. Па, ти беше таму три години. Требаше да го завршиш пред три години. Никогаш не требаше да ја започнеш“, рече Трамп, мислејќи на војната, која беше предизвикана од руската инвазија на Украина во февруари 2022 година.
Враќајќи се на темата за разговорите на високо ниво меѓу руските и американските претставници во Саудиска Арабија, на кои Вашингтон и Москва се договорија да назначат преговарачи за војната, без учество на Европејците и Киев, американскиот претседател оцени дека тие „биле многу добри“ и рече дека сега е „многу посигурен“ во можноста за постигнување договор за завршување на војната.
„Русија сака да направи нешто. Тие сакаат да го запрат суровото варварство“, рече тој.
Запрашан за можна средба со Владимир Путин пред крајот на следниот месец, Трамп рече дека тоа е „веројатно“.
Трамп ги шокираше Европа и Украина со тоа што му се јави на Путин минатата недела за да разговара за можен крај на конфликтот.
Во изјавата за новинарите вчера, тој исто така ја критикуваше Украина за проневера на дел од американската помош што пристигнува од почетокот на конфликтот.
„Претседателот Зеленски ми кажа минатата недела дека не знае каде се половина од парите што им ги дадовме“, рече Трамп, а потоа го критикуваше недостатокот на избори во Украина од почетокот на руската инвазија.
„Имаме ситуација кога немавме избори во Украина каде што во суштина имаме воена состојба и каде што лидерот на Украина, жал ми е што го кажувам тоа, но тој има четири отсто позитивно одобрување“, рече Трамп на прашањето дали Вашингтон го поддржува принудувањето на Киев да одржи избори, како што можеби сака Русија.
Запрашан за идејата што се појави и ги дели европските земји за испраќање европски мировни сили во Украина, Трамп рече дека „ако тие сакаат да го направат тоа, тоа е одлично, дека апсолутно го поддржувам“, додавајќи дека САД нема да испраќаат свои војници таму бидејќи „тие се“, како што додаде, „многу далеку“.
Тој повика и на изедначување на помошта дадена за Украина од Европа и Вашингтон.
„Ние им дадовме, мислам 350 милијарди долари, тоа е многу и тоа треба да го усогласиме со Европа, бидејќи Европа даде многу помалку од тоа“, рече Трамп.