Илјадници демонстранти се собраа во Вашингтон да протестираат против Илон Маск и администрацијата на американскиот претседател Доналд Трамп.
Протестот се одржа на плоштадот Унион, спроти американскиот Капитол, каде учесниците извикуваа слогани против Трамп и Маск и држеа транспаренти против американската администрација.
Организирани од движењето „50501“ – скратено од „50 протести во 50 земји, едно движење“ – демонстрациите се одржаа под слоганот „Ден без крал“, во врска со празникот Денот на претседателот, јавува Anadolu Agency.
Демонстрантите носеа натписи на кои пишуваше: „Никој не го избра Маск“ и „Испрати Маск на Марс“, додека други извикуваа: „Стоп за пучот“.
Протести во десетици градови
Демонстрациите дојдоа помалку од две недели по слични протести низ целата земја во десетици американски градови.
Цел на двата протести беа Трамп и неговиот советник, милијардерот Илон Маск, кој го предводи новиот Оддел за владина ефикасност (ДОГЕ) на Трамп.
Тоа е надворешна владина организација, дизајнирана да ги намали федералните трошоци, пишува Бета, повикувајќи се на АП.
Организаторите на протестите во главните градови на државите и големите градови рекоа дека протестираат против „антидемократските и незаконски дејствија на администрацијата на Трамп и нејзините плутократски сојузници“.
Собирите следеа по серија извршни наредби на Трамп, само неколку дена откако започнаа масовните отпуштања во федералните агенции како дел од напорите на DOGE да ги намали владините трошоци.
Движењето „50501“ го одржа својот прв протест на 5 февруари, а планирани се демонстрации во Оклахома Сити, Тампа, Филаделфија, Питсбург, Анаполис, Орландо, Синсинати и неколку други градови.