Американскиот државен секретар Марко Рубио денеска ќе отпатува за Минхен за да учествува на Минхенската безбедносна конференција, каде со меѓународните партнери ќе разговара за низа американски приоритети, соопшти Стејт департментот.
Во соопштението се вели дека додека е во Минхен, Рубио ќе учествува и на состанокот на министрите за надворешни работи на Групата 7 (Г7).
Како што беше најавено, Рубио потоа ќе отпатува во Израел, Саудиска Арабија и Обединетите Арапски Емирати од 15 до 18 февруари.
Нагласено е дека Рубио на средбите со високи претставници ќе ги промовира американските интереси за унапредување на регионалната соработка, стабилност и мир.
Во соопштението се наведува дека Рубио конкретно ќе се фокусира на ослободувањето на американските и сите други заложници кои ги држи палестинската милитантна група Хамас, унапредувањето на втората фаза од договорот за прекин на огнот меѓу Израел и Хамас во Појасот Газа и спротивставувањето на дестабилизирачките активности на иранскиот режим и неговите посредници, пренесува Танјуг.