Лидерите на земјите-членки на ЕУ се собираат во понеделник во Брисел за неформално да разговараат за европската одбрана во контекст на зголемените геополитички тензии, особено за војната во Украина.
Неформалните собири на шефовите на држави или влади на ЕУ се наменети за размена на мислења за конкретни теми со цел да се подготви теренот за подоцнежни одлуки и законодавни иницијативи.
Новиот претседател на Европскиот совет, Антонио Кошта, пред преземањето на функцијата најави дека сака периодично да организира неформални состаноци на лидерите на ЕУ за да можат на мир да разговараат за актуелните теми, без обврска да носат какви било одлуки или заклучоци.
Лидерите ќе се сретнат во палатата Егмонт во Брисел.
На состанокот беа поканети и генералниот секретар на НАТО Марк Руте и британскиот премиер Кир Стармер.
На самиот почеток на средбата ќе учествува претседателката на Европскиот парламент Роберта Мецола, а веднаш потоа лидерите на 27-те земји ќе започнат дискусија за актуелната геополитичка ситуација.
За време на ручекот ќе им се придружи генералниот секретар на НАТО Руте, со кого ќе разговараат за соработката ЕУ-НАТО.
Лидерите попладне ќе разговараат за зајакнување на европската одбрана, а вечерта ќе им се придружи и британскиот премиер Кир Стармер на работна вечера.
По собирот не се планирани заеднички изјави, но планирана е заедничка прес-конференција меѓу претседателот на Европскиот совет Антонио Кошта, претседателката на Комисијата Урсула фон дер Лајен и полскиот премиер Доналд Туск, чија земја во моментов претседава со Советот на ЕУ.
Неформалниот собир се смета за важен чекор во подготовката и обликувањето на насоките за идните одбранбени одлуки.
Следен чекор ќе биде објавувањето на Белата книга, која Комисијата ја подготвува заедно со високата претставничка за надворешна и безбедносна политика на ЕУ, Каја Калас.
Целта на Белата книга е да започне дебата со јавноста, засегнатите страни, Европскиот парламент и Советот со цел да се постигне политички консензус.
После тоа, прашањето за одбраната ќе биде тема на редовниот самит на ЕУ во јуни, каде лидерите ќе донесат заклучоци.