Европа мора да ги зголеми трошоците за оружје и подобро да ја координира одбраната поради хибридните закани од Русија и наводната саботажа на кабелот под Балтичкото Море, изјави во интервјуто финскиот претседател Александар Стуб, пренесува АФП.
„Одморот од историјата на Европа сега заврши“, изјави тој за новинскиот канал „Еуроњуз“.
Изјавата на Стуб дојде откако тој беше домаќин на состанокот на лидерите на Организацијата на Северноатлантскиот договор (НАТО) од земјите кои граничат со Балтичкото Море во Хелсинки во вторникот.
Загриженоста за безбедноста на регионот се зголеми по прекинот на неколку подводни телекомуникациски и енергетски кабли во последниве месеци, инциденти за кои експертите и политичарите велат дека се дел од акциите на хибридна војна организирани од Русија.
„Во моментов доаѓаат многу лоши намери од Руската Федерација и тоа е новата нормала со која треба да живееме“, изјави Стуб за Euronews.
„Мораме да ги зголемиме трошоците за одбрана бидејќи нашиот одмор од историјата сега заврши. Во наш личен интерес е да трошиме повеќе за одбрана“.
Мисија „Балтички чувар“
Европа, исто така, треба „подобро да ја здружи нашата одбрана“ и тесно да соработува со САД, додаде финскиот лидер.
По состанокот во вторникот, водачите на земјите од Балтичкото Море и генералниот секретар на НАТО Марк Руте го најавија започнувањето на патролна мисија на Балтичкото Море (Baltic Sentry) за обезбедување на критична подводна инфраструктура.
Ќе ја следи и руската „флота во сенка“ – често застарени бродови кои работат под нејасна сопственост и транспортираат руска сурова нафта и нафтени деривати, кои се под ембарго од инвазијата на Украина. Baltic Sentry ќе вклучува фрегати, поморски патролни авиони, подморници и беспилотни летала.