Франција испрати остра порака до Доналд Трамп, откако новоизбраниот претседател на САД одби да ја исклучи воената акција за преземање на контролата врз Гренланд, автономна територија што и припаѓа на Данска, членка на Европската унија.
Францускиот министер за надворешни работи Жан-Ноел Баро изјави за радиото Франс Интер:
„Европската унија нема да дозволи ниту една земја, каква и да е таа, да ги загрозува нејзините суверени граници“.
Тој додаде дека не верува оти САД ќе го „нападнат“ Гренланд, но предупреди дека „се наоѓаме во ера на враќање на посилен закон“.
На прес-конференцијата во вторникот, Трамп не ја исклучи можноста воена сила да ги преземе Гренланд и Панамскиот канал и навести планови за економски притисок врз Канада да стане дел од САД.
Неговиот син, Доналд Трамп Џуниор, по овие изјави отпатува во Нук, главниот град на Гренланд, на, како што рече, приватна посета. Таму остана само неколку часа и не се сретна со владини претставници.
Трамп минатиот месец рече дека контролата на Гренланд е „апсолутна неопходност“ за економската безбедност на САД. Сепак, властите на Гренланд јасно ставија до знаење дека територијата не е на продажба.
Данскиот премиер Мете Фредериксен и премиерот на Гренланд Муте Егеде истакнаа дека Гренланѓаните треба да одлучат за нивната иднина.
„Постои силна поддршка меѓу Гренланѓаните дека Гренланд не е и нема да биде на продажба. Гренланд им припаѓа на Гренланѓаните“, рече Фредериксен.
Гренланд, најголемиот остров во светот со околу 57.000 жители, има право да одржи референдум за независност од 2009 година.
Егеде, член на партијата ИА, која се залага за независност на островот, повтори минатата недела:
„Гренланд не е и никогаш нема да биде на продажба“.
Баро, исто така, ја повика ЕУ да се спротивстави на заканите на Илон Маск, кои беа насочени кон европските лидери, особено кон германскиот канцелар Олаф Шолц.
„Доколку Европската комисија не знае како да не заштити од вакво мешање или закани, тогаш мора да им дозволи на земјите-членки, вклучително и Франција, да се заштитат себеси“, заклучил Баро, според Гардијан.